Kanda Santu ya Nzambe

Nayebisi bato nyonso ete ntango ya Mawa pe Motema Molai na ngai esili. Makasi ezwi esika ya Bolingo na ngai. Ngonga ya kosala lokola Nkosi ya libota ya Yuda ebeti. Bokoyoka mongongo na ngai ya makasi bisika nyonso na mabele, na bandako na bino, na misala na bino, na mangomba na bino, kati na bino pe zingazinga na bino. Ntango ya maseki esili. Banda kala, napesaki biyebisi, kasi koleka napesi bino biyebisi, koleka bozwaka yango lokola lisano, na lisungi ya satana oyo akosaka bino, atindaka bino na mobulu pe na kobungisa nzela.

Bokoyoka Ngai, bokoyoka mpasi na Ngai, bokomona Ngai, na lolenge moko to mosusu, pe bokosengela kondima Ngai na nzela ya bilembo ya Kanda na ngai ya Santu, mpamba te ekonyokola bino makasi. Mpasi oyo ekoya ekotinda bino kobosana kozala ya satana oyo akokoka lisusu te kosala maseki. Matoyi na bino ya makasi ekokoma pete lokola mabele ya potopoto. Motema na bino ya moto ekofungwama na komikitisa pe kososola. Bokobosana ete bozalaka na motó makasi, pe bokokoma mbala moko bato ya komikitisa pe ya botosi, mpo na kozanga nzela ya kobima. Bokimiseli ya bato mingi ekokola koleka pe bokolembana ya kokunda bakufi na bino, kotalaka mokolo na mokolo kufa na bino moko.

Bokozala na mobulu, bokobungisa nzela, pe basakoli na bino ya lokuta bakotika bino na makambo na bino ya mawa, mpamba te bakoluka kozipa mito na bango moko. Nyonso ekozala na molunge, pe bokozanga makasi. Kanda na Ngai ya Santu ekokweya likolo ya bato nyonso kino kopetolama mobimba. Nakonokisa moto pe sufulu uta na likolo, ndenge nasalaki na Sodoma pe Gomora [1]. Nakozikisa bamoko kati na bino na moto na ngai ya makasi, ndenge nasalaki na Nadabu pe Abihu, bana mibali ya Alona [2].

Nkake ya Kanda na ngai ya Santu ekokweya likolo ya bato nyonso oyo bazali na bomoi ya kozanga botosi, ya kozanga bosembo pe baoyo bapesami na esengo nyonso na lokuta, mayele mabe pe kobebisa Solo na ngai ya Solosolo [3] na mabele. Nakozala na mawa te mpo na bato nyonso oyo batosaka ngai te [4], mingimingi mpo na basali ya Nzambe nyonso oyo babungi nzela. Nakopesa nsoni, bolongi na bolongi na satana pe bibongiseli na ye ya mawa, ndenge nasalaki na Falo pe basoda na ye, na Ebale ya Motane [5]. Mpasi na bino ekozala makasi mpenza kino bokobungisa lokumu nyonso mpo na nyama [6]. Bopemi ekozala te mpo ete bozwaki ntango ebongi mpo na komibongola. Mabondeli na bino ekozala mpamba mpo ete banda kala bokosaki ngai na lokuta na bino oyo ezalaki na suka te.

Bozali nani mpo na kopesa ngai bitongi nyonso oyo, mpo na kozwa Nkombo na ngai na pamba, mpo na kosolola na ngai ndenge wana? Mpo na nini bozangi botosi nyonso oyo, kozanga limemya oyo ezangi nkombo? Bobomba likambo oyo malamu: Nakoki kokanga bino, kobebisa bino pe kotonga bino lisusu na sekonde moko. Nakoki kolongola bino mbala nkoto pe kozongisa bino mbala nkoto. Nakoki kolongola bino pema ya bomoi na sekonde moko. Nyonso etali Mokano na ngai; ata misuni kati na nzoto na bino etosaka ngai.

Kobanda sikawa, nakolakisa bino Nguya na ngai, mpo na kopesa bino likanisi ya nani ngai nazali mpenza. Ezali Ngai nde napesaka mitindo, natindaka, natomboli mongongo, pe bosengeli kogumbama, koyoka Ngai pe koloba, amen! Nakosala lisusu maseki te elongo na bino. Moto oyo akopesa ngai limemya te akokufa na mbalakata, elimo na ye ekozala lisusu te, ata na lifelo te. Bapesaka ngai limemya te. Nazali na Mawa, kasi ezali na makambo mosusu oyo nalimbisaka te. Ezali Ngai Nzambe nde nakoki kosala maseki na bino, kasi bokoki te kosala bongo. Mpamba te bozali eloko te liboso na elongi na ngai.

Nakopetola mabele mpo na molongo ya sika ya bato oyo ekotelema likolo ya losambo ya solo ya Nzambe-na-Nguya-Nyonso. Nakolongola bakambi nyonso oyo bazali na bokila ya satana, mpo na kotia baoyo bakobongisa bokonzi ya Mibu Nkoto moko. Kaka basali ya Nzambe oyo bakozala na bomoi ya bosantu pe botosi nde bakozwa ndingisa ya kokamba bana na ngai, na mokili mobimba. Bango basengeli kotambwisa bana na ngai na bomoi pe losambo ya Nzambe ndenge ezali na likolo. Bato nyonso oyo bakoluka kotelemela mopepe oyo ya mbongwana bakobwakama na kozelaka te.

Na ndenge ekeseni na oyo bokoki kokanisa, ezali Ngai nde natiaka bakambi ya mikili. Nandimaki banda kala bakambi ya moyibi, banyokoli pe baoyo bazali na ngambo ya satana, na botosi ya mibeko na ngai ya bondeko pe ntina na mbuma. Mpamba te bato nyonso bazwaka mokambi oyo akokani na bango: bato ya mobulu batambuisamaka na moto ya mobulu; bato ya bonganga, ya molili basengeli na mokambi ya satana; bato ya moyibi batambuisamaka na bayibi; bato ya maseki batiamaka na se ya mitindo ya moto ya maseki, pe bongo na bongo.

Na ntango ya molongo ya sika ya bato kolanda Mokano ya Nzambe, makambo ekosalema mpenza kolanda Mokano na ngai pe Mibeko na ngai ya Bosantu. Nakopona kaka bakambi oyo bakokamba na kobanga Nzambe, na bondeko elongo na Ngai, Nzambe Mokeli na bino. Nakoloba na bango mbala moko oyo basengeli kosala. Bakozala lisusu na bosenga te ya bamonisi, basakoli, banganga-nkisi, bamoni ya lokuta pe ya moyibi... Bakambi yango bakozala basali ya Nzambe na mosala. Bakozala na mokumba ya kotombola bato na bango mpo na kokamba bango na bomoi ya botosi.

Na yango, mokambi nyonso oyo azali na bomoi ya botosi akotikala na esika na ye ntango nyonso oyo Ngai nakokata bongo. Mangombo to mayele mabe moko te ekoki kosimba ye wana azali na se ya bobateli na ngai oyo ebukamaka te. Nalobi te mpo na bato ya bilongi mibale pe basali ya mayele mabe. Moto moko te akoki kokosa ngai mpamba te namoni kati na motema ya moko na moko na bino. Maloba na ngai elangwisa bino te mpamba te molongo ya sika oyo ya bakambi eyebani. Bamosusu bazali na mabele pe mingi bazali koya kobotama. Bakozala baanzelu ya nguya oyo batia nzete na mabele te. Moko na moko akobotama na elimo-ndeko na ye oyo ekokana na nguya pe mosala na ye. Nani kati na bino basi abolingaka te kozala mama ya molongo ya sika oyo ya bato?

Basi nyonso ya pamba, ya kozanga boyengebene, ya mbindo, ya kozanga botosi pe ya milimo mabe bakozala bomi mpo na bomoi mobimba. Kaka baoyo bakozala na bomoi na kobanga ngai, na bopeto pe boyengebene bakoki kozwa zemi pe kopesa bomoi. Bakoyamba na mabumu na bango bana ya molimo makasi oyo bakoya kotia bokonzi na ngai ya kimia na mabele. Na lolenge wana, baanzelu bakotondisa mabele mpo na kopesa ngai lokumu pe nkembo. Solo, baanzelu na ngai bakobotama na mabele, ndenge esalemi kala na mabota mosusu. Bazali kati na bino na nzoto ya bomoto.

Sikawa, bikelamu na ngai ya pole ya minene oyo bawuti na likolo mbala moko bazali na mosala mpo na eteni ya kopetolama. Batelemi likolo ya mabele, milayi koleka bangomba ya milayi koleka ya mabele. Bamosusu kati na bino bamonaka bango na ndoto. Pema na bango ya kopetola ebakisaka bakufi pe makama ya mokili. Bakopetola pe bakopetola mabele na bisika na yango nyonso ya molili koleka. Yango ekosalema te na kozanga mpasi mpamba te botondisi mabele na milimo mabe pe bikelamu ya molili ya ndenge nyonso. Basilaki kosimba misisa pe bakanisaka ete bazali na ndako na bango. Bokeli bango pe boleisaka bango na nzela ya masumu na bino ya mbindo.

Nazongiselaka bino likambo oyo: kala mingi te, bokomona na likolo Monzoto monene oyo natindi mpo na kopetola mabele. Nguya na yango ya kobenda ebandi kosala ete mpela pe makama ya mokili ebakisama. Monzoto oyo eyei kobakisa nguya ya monene ya Monzoto ya Beteleme oyo ekiti na mabele mibu nyonso, na mokolo ya mbotama ya Yesu Klisto, 29 ya sanza ya zomi na mibale.

Mopepe oyo ya kopetola ekotika bato nyonso oyo batikali sembo epai na ngai. Ekozala ndenge moko mpo na bato nyonso oyo balongaki mosala ya komikaba pe kopesa bomoi na bango mobimba, pe baoyo bazali na bomoi ya bosantu pe botosi. Ezali kaka bango nde bakozala na se ya bobateli na ngai. Lokola ezali mimeseno na bino, bokoba koseka, kozwa makambo oyo ekoya na pete, mpamba te bozali na motó makasi lokola mulet. Bosala maseki! Bayebisi bino!

[1] Genèse 19:24-25, [2] Lévitique 10 :1-2, [3] Romains 1:18, [4] 1 Rois 11:9-10, [5] Exode 14:15-28, [6] Apocalypse 13:3

[1] Ebandeli 19:24-25 [2] Levitike 10:1-2 [3] Baloma 1:18 [4] 1 Bakonzi 11:9-10 [5] Exode 14:15-28 [6] Emoniseli 13:3

 Nsango eyei uta na Nkolo Nzambe mpe etindami ndenge ezali.

Likambo ya motuya: Bosalisa mpo bato bayeba Solo na KOPANZAKA yango epai ya bato ebele oyo bokoki. NZAMBE APAMBOLA BINO!

Traduction du message original "La Sainte Colère de Dieu", disponible sur AGA News
En cas de difficulté de compréhension des textes, référez-vous au message original en Français.

AGA News - TIA Lazare

Source Ph. illustration: www.freepik.com